ಬಿದಿರೆಂಬ ಸೋಜಿಗ

ಬಿದಿರು ಮೆಳೆಗಳು ಸುರಿಸಿದೆ ಅಕ್ಕರೆಯ ಅಕ್ಕಿಯನು
ಉದರ ಪೊರೆಯಲು ಯೋಗ್ಯವಾಗಿಸಿ ಅಗುಳನು
ಮೆದುವಾದ ಅನ್ನ ಹೊಕ್ಕಿತೆಂತು ಗಟ್ಟಿ ಬಿದಿರನು
ಹುದುಗಿದೆ ಸೋಜಿಗ ನೋಡು ಮೇಳೈಸಿದೆ ತುತ್ತನು||

ಗಳೆಗಾರನ ಗಳಿಕೆಯದು ತುಂಬಿದೆ ಗಳಗೆಯೊಳು
ಬೆಳೆದ ಗಳೆಗಳು ಕೆಳಗೆ ಗಳಿಯಿಸಿದೆ ಅಕ್ಕಿಗಳು
ಕಳಮೆಯೊಳಗುಂಟು ರೋಗಹರ ಗುಣಸತ್ವದಗುಳು
ಕಳಚುವುದು ಚಿಗುರೆಲೆ ಲೇಪದಲಿ ನೋವು ಬಾವುಗಳು||

ಕಳಲೆಯಲ್ಲಿದೆ ನೋಡು ರಕ್ತಶೋಧಕ ಗುಣವು
ಕೊಳಲು ಮೂಡುತಲಾಗ ಹೊಮ್ಮಿಸಿತು ನಾದವು
ಸೆಳೆವ ಬಾನ್ಸುರಿಯಾಗಿ ತೇಲಿಸಿದ ರಾಗವು
ತಳಿರಾದ ತೆನೆಹುಲ್ಲು ಮರವಾದ ಸೋಜಿಗವು ||

ಮೊರವಾಗಿ ಹಾರಿಸಿ ಕೊಳೆ ಕಲ್ಮಶಗಳ ಬೇರ್ಪಡಿಸಿದೆ
ಗುರುವ ಕೈಯಲ್ಲಿ ಹೊಳೆಯುವ  ದಂಡವಾದೆ
ವಿರಮಿಸಲು ಚೆಲುವ ಶೃಂಗಾರ ಪೀಠವಾಗಿ ಮೈದಳೆದೆ
ಕರೆಬಂದಾಗ ಅಣಿಯಾಗುತ ಒಯ್ಯಲು ಚಟ್ಟವಾದೆ ||

-ಪದ್ಮಾ ಆಚಾರ್ಯ