ಸೇರುವೆನೆ ನಿನ್ನ

ಯಾವ ತಿರುವನು ಬಳಸಿ
ಬರಲಿ ನಿನ್ನಲಿ ಗೆಳತಿ
ನಮ್ಮ ದಾರಿಯ ಬೆಸೆವ
ಬಿಂದುವೆಲ್ಲಿ ॥

ಅಡ್ಡ ಹಾಯುವ ಜಾಡು
ದಿಣ್ಣೆಗಳು ತಗ್ಗುಗಳು
ದಿಕ್ಕು ತಪ್ಪಿಸಿ ನನ್ನ
ಬಳಲಿಸಿವೆಯೇ ॥

ಕಲ್ಲು ಮುಳ್ಳಿನ ದಾರಿ
ಸುಳಿಯ ಸೆಳವಿನ ಹೊಳೆಯು
ಹೆಜ್ಜೆ ಹೆಜ್ಜೆಗು ಅಡರಿ
ತೊಳಲುತಿರುವೆ ॥

ನೇಸರನು ಮುಳುಗುತಿಹ
ಕತ್ತಲಿಳಿದಿದೆ ಕಣ್ಗೆ
ಕೈಹಿಡಿದು ನಡೆಸುವ
ಕರುಣೆಯೆಲ್ಲಿ ॥

ಕಾಲು ಸೋತಿವೆ ನೋಡು
ಎದೆಗೆಟ್ಟು ಕುಸಿಯುತಿಹೆ
ಮೃತ್ಯು ಎರಗುವ ಮುನ್ನ
ಸೇರುವೆನೆ ನಿನ್ನ ॥

* ಗೋವಿಂದ ಹೆಗಡೆ

+8