ತಡ ಮಾಡು; ಪವಾಡ ನೋಡು

ಹತ್ತು ನಿಮಿಷ ನಿಧಾನಿಸು, ಸುಮ್ಮನಿದ್ದು ಧ್ಯಾನಿಸು;
ನಿನ್ನ ಕುರಿತು ಬಂದ ಮಾತಿಗೆ ; ಮಂದಿ ಮನಸಿಗೆ !

ಹರಿವ ನೀರನು ನೆನಪಿಸು, ಕಸಕಡ್ಡಿ ತೇಲುವ ತಾಮಸವ ಗಮನಿಸು
ನಿನ್ನನೇ ‘ಲೋಕಿʼಸುವ, ಅವಲೋಕಿಸುವ ಏಕಾಗ್ರತೆಗೆ ; ಜಾಗ್ರತೆಗೆ !

ಹತ್ತು ನಿಮಿಷ ನಿಧಾನಿಸು, ನೀ ಪ್ರತಿಕ್ರಿಯಿಸುವ ಮುನ್ನ ;
ಪ್ರತಿಬಿಂಬಿಸುವ ನಿನ್ನ ಕನ್ನಡಿ ಬಿಂಬಕೆ ; ಡಂಬಡಿಂಬಕೆ !

ಮೌನವಾಗುರಿವ ನೇಸರನುದಯ ಕಾಣಿಸು, ತಂಪೆರೆಯುವ
ಚಂದಿರನ ಚಂದ ಛಾಪಿಸು ; ಬಡಬಡಿಸುವ ಬಡಾಯಿಗೆ !

ಒಳಗೆ ಹುಟ್ಟಿ ಮೂಳೆಮಜ್ಜೆಯ ಕುಟ್ಟಿ ಕಾರುವ, ತಾಪವ ಅಲ್ಲೇ ಶಾಂತಿಸು;
ಕಾರಿಕೊಳುವ ನಿನ್ನ ಅವಿವೇಕದ ಹಳಸಲು ವಾಂತಿಗೆ ; ವ್ಯರ್ಥಕ್ರಾಂತಿಗೆ !

ನಿನ್ನೆಲ್ಲ ಅಹಮಿಕೆಯ ಪರಿತಾಪದ ಬೆಂಕಿಗೆ, ಉರಿದು ಬೂದಿಯಾದ ಏನೆಲ್ಲ
ಜೀವ ಭಾವಕೋಶ ತೂರಿ ಹೋಗಲಿ ಬಯಲಿಗೆ ; ತಡೆಯಿಲ್ಲದ ಗಾಳಿಗೆ !

ನಿನ್ನೊಳಗೇ ನಡೆದು ಆನಂತರ, ನೀನಾಗಲು ಪ್ರಯತ್ನಿಸು; ಆಗಲೂ
ಸ್ಪಂದನ ಬೇಕೆನಿಸಿದರೆ ಪ್ರಜ್ವಲಿಸು, ದೀಪದೆಣ್ಣೆ ಬೆಳಕಿಗೆ ; ಬಾಳಿಗೆ !

ಆರುನೂರು ಸೆಕೆಂಡು, ನಿನ್ನೊಳಗಿಣುಕಿ ನೋಡು; ಪವಾಡ ಮಾಡು !
ಸಹನಿಸು ; ಮನವ ಸಾಂತ್ವನಿಸು; ಸುಮ್ಮನಿದ್ದು ‘ಸಂತʼಸಿಸು !

ಮಾತು ಮದ್ದಲ್ಲ ; ಎದುರಾಳಿಗೆ ಗುದ್ದಲ್ಲ ! ‘ಅಕ್ರಿಯೆʼ ನಿನಗೆ ಗೊತ್ತಿಲ್ಲ,
ಹೂವರಳಿ ನಗುವ ನಿಶ್ಶಬ್ದಕೆ ಯಾರ ಹಂಗೂ ಇಲ್ಲ !

-ಡಾ. ಹೆಚ್‌ ಎನ್‌ ಮಂಜುರಾಜ್‌