ಏಕೆ ಮುನಿಸು ಮೋಡಗಳೇ 

ಏಕೆ ಈ ಮುನಿಸು
ಓಡುವ ಮೋಡಗಳೇ
ನಾಲ್ಕು ಹನಿಯ ಚೆಲ್ಲುವ
ಮನಸು ನಿಮಗಿಲ್ಲವೇಕೆ

ಬಾಯಾರಿದ ಒಡಲು ಬೇಡಿದೆ
ಬರಿದಾದ ಎದೆಯ ತಣಿಸಬಾರದೆ
ಬಿರಿದ ಭೀಕರ ಬರದ ಬೇಗೆಯ
ತಡೆಯಲು ನೀ ಬರಬಾರದೆ

ಆಷಾಡವೂ ಕಳೆದುಹೋಯ್ತು
ಆದರೂ ಒಂದು ಹನಿಯ ಸುಳಿವಿಲ್ಲ
ಮೇವಿಲ್ಲದೆ ನೀರಿಲ್ಲದೆ ಬಳಲಿದ
ಜೀವಗಳಿಗಿನ್ನು ಉಳಿಗಾಲವಿಲ್ಲ

ಭಣಗುಡುತಿದೆ ಒಣನೆಲ
ಬೆಂಬಿಡದೆ ಕಾಡುತಿದೆ ಬರ
ಮರುಭೂಮಿಯಂತಾಗಿರಲು
ಮರುಜೀವ ಮರುಪೂರಣವಾಗುವುದೇ

ನಮ್ಮ ತಪ್ಪನು ಮನ್ನಿಸಿ
ನಾಲ್ಕು ಹನಿಯ ಸುರಿಸಿ
ಭರವಸೆಯ ತುಂಬಿ ಮೋಡಗಳೆ
ಕಾದ ಕೆಂಡದಂತಾಗಿದೆ ಈ ಇಳೆ