ಸೋರಲಿಲ್ಲ ನುಡಿಸಿರಿಯ ಮಾಳಿಗಿ…

ಹೇಮಮಾಲಾ.ಬಿ

ಅಂದು 14 ನವೆಂಬರ್ 2014 . ಮೂಡಬಿದ್ರೆಯ ಆಳ್ವಾಸ್ ಕಾಲೇಜಿನಲ್ಲಿ ಆವರಣದಲ್ಲಿ ಕಿಕ್ಕಿರಿದ ಜನಸ್ತೋಮವು 11 ನೆಯ  ನುಡಿಸಿರಿಯ ಸಾಹಿತ್ಯಿಕ-ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಕಣ್ತುಂಬಿಸಿಕೊಳ್ಳುತ್ತಾ,  ಆಲಿಸುತ್ತಾ ವಿವಿಧ ಸಭಾಂಗಣಗಳಲ್ಲಿ ಆಸೀನರಾಗಿತ್ತು. ಇನ್ನು ಕೆಲವರು ಅಲ್ಲಲ್ಲಿ ಓಡಾಡುತ್ತಾ ಸಂಭ್ರಮಿಸುತ್ತಿದ್ದರು.

ಪಶ್ಚಿಮ ಕರಾವಳಿಯಲ್ಲಿ ನವೆಂಬರ್ ತಿಂಗಳಲ್ಲಿ ಸಾಮಾನ್ಯವಾಗಿ ಧಾರಾಕಾರವಾಗಿ ಮಳೆ ಬರುವುದಿಲ್ಲ. ಆದರೆ ಬಹಳ ಉತ್ತಮವಾಗಿ ಕಾರ್ಯಕ್ರಮಗಳನ್ನು ಆಯೋಜಿಸುವ ಆಳ್ವಾಸ್ ಸಂಸ್ಥೆಯ ನುಡಿಸಿರಿಯ ರೂವಾರಿಗಳ ತುರ್ತುಸಂದರ್ಭ ನಿರ್ವಹಣಾ ಸಾಮರ್ಥ್ಯವನ್ನು  (Emergency Preparedness and  Contingency Plan) ನೋಡಿಯೇ ಬಿಡೋಣ ಎಂದು ಖುದ್ದಾಗಿ   ವರುಣನೇ ಲಿಟ್ಮಸ್ ಪರೀಕ್ಷೆಯ ಸವಾಲೆಸೆದಂತೆ, ಸಂಜೆ ಸುಮಾರು ನಾಲ್ಕು ಗಂಟೆಯ ವೇಳೆಗೆ ಮೋಡ ಕವಿದ ವಾತಾವರಣ ಸೃಷ್ಟಿಯಾಯಿತು. ಗಡಚಿಕ್ಕುವ ಗುಡುಗು-ಸಿಡಿಲಿನ ಅಬ್ಬರದೊಂದಿಗೆ ನಿರಂತರ 2 ಗಂಟೆಗಳ ಕಾಲ ಮುಸಲಧಾರೆಯಾಗಿ ಮಳೆ ಸುರಿಯಿತು.

ನುಡಿಸಿರಿಗೆ ಆಗಮಿಸಿದ್ದ ಉತ್ತರ ಕರ್ನಾಟಕದವರೊಬ್ಬರು ಪಡುವಣ ತೀರದ ಕನ್ನಡ ನಾಡಿನ ಕಾರ್ಗಾಲದ ವೈಭವವನ್ನು ಕಂಡು ದಂಗಾಗಿ “ಏನ್ ಮಳಿ ಇದ…… ತಲಿ ಮ್ಯಾಲ ಬಿಂದಿಗ್ಯಾಗ ಸುರಿದಂಗೆ…..” ಎಂದು ಉದ್ಗರಿಸಿದರು.

ಇಷ್ಟು ಮಳೆ ಸುರಿಯುತ್ತಿರುವಾಗ ‘ರತ್ನಾಕರ ವರ್ಣಿ ವೇದಿಕೆ’ಯಲ್ಲಿ ಚಪ್ಪರದಿಂದ ಮಳೆನೀರು ಸುರಿದು ಸಭಾಂಗಣವಿಡೀ ನೀರು ತುಂಬಿರಬಹುದು, ಜನರು ಮಳೆಯಲ್ಲಿ ಅತ್ತಿಂದಿತ್ತ ಓಡಾಡಿ  ಚಪ್ಪಲಿಯಲ್ಲಿ ಮಣ್ಣು ಸೇರಿ ಕೊಚ್ಚೆ ನಿರ್ಮಾಣವಾಗಿರಬಹುದು ……ಎಂದು ನಿರೀಕ್ಷಿಸಿದ್ದ ನನಗೆ,  ಅಲ್ಲಿ ಎಲ್ಲೂ ನೀರು ಸೋರದೆ, ಸಭಾಂಗಣವೂ ಸ್ವಚ್ಛವಾಗಿದ್ದು  ನಿಗದಿತ ಕಾರ್ಯಕ್ರಮಗಳು ಸುಸೂತ್ರವಾಗಿ ನಡೆಯುತ್ತಿರುವುದು ನೋಡಿ ಆಶ್ವರ್ಯವಾಯಿತು! ಎಂತಹಾ ವ್ಯವಸ್ಥೆ, ಅಚ್ಚುಕಟ್ಟು, ಸ್ವಚ್ಛತೆ, ಪೂರ್ವತಯಾರಿ ಎಂದರೆ ಹೀಗಿರಬೇಕು!

ಇದು ಒಂದು ಉದಾಹರಣೆಯಷ್ಟೆ. ಆಳ್ವಾಸ್ ನುಡಿಸಿರಿಯಲ್ಲಿ ಪ್ರತಿಹೆಜ್ಜೆಯಲ್ಲೂ ಉತ್ತಮವಾದ ತಂಡಸ್ಪೂರ್ತಿ, ಸಂಯೋಜನೆ ಮತ್ತು ಕಾರ್ಯಕ್ಷಮತೆ ಎದ್ದು ಕಾಣಿಸುತ್ತಿತ್ತು.

ಎಷ್ಟೇ ಕಾಳಜಿ ವಹಿಸಿ ವ್ಯವಸ್ಥಿತವಾಗಿ ಆಯೋಜಿಸಿದರೂ ಸಣ್ಣ-ಪುಟ್ಟ ಅನಾನುಕೂಲತೆಗಳು ಉಂಟಾಗುವ ಸಂಭವನೀಯತೆ ಇರುತ್ತದೆ. ಹಾಗಾಗಿ, ನನ್ನ ಪ್ರಕಾರ ನುಡಿಸಿರಿಯ ಲೋಪದೋಷಗಳನ್ನು ಎತ್ತಿ ಹಿಡಿಯುವವರು ‘ಪರರಲ್ಲಿ ಕುಂದನಲ್ಲದೆ ಒಳಿತ ಕಾಣೆ’ ಎಂದು ಅರ್ಧದಷ್ಟು ನೀರು ತುಂಬಿರುವ ಲೋಟವನ್ನು  Half Glass Empty – ಎಂದು ಸಾಧಿಸುವವರು!

ಜೈ ಆಳ್ವಾಸ್ ನುಡಿಸಿರಿ!

– ಹೇಮಮಾಲಾ.ಬಿ

+155