ಅವಳು ಮತ್ತು ಬೆಕ್ಕು

Share Button

Ku.Sa.Madhusudan

 

ಬೆಕ್ಕುಗಳೆಂದರೆ ಅವಳಿಗೇನೋ ಆಕರ್ಷಣೆ

ಅದಕೆಂದೇ ಕೆಂದು ಬಣ್ಣದ ಬೆಕ್ಕೊಂದಕ್ಕೆ ಹಾಲು ಅನ್ನ ಹಾಕಿ

ಸಾಕಿ ಕೊಂಡಿದ್ದಳು

ಬಂದವರೆದುರಲ್ಲಿ ಅದರದೇ ಗುಣಗಾನ

ಅದರ ತೀಕ್ಷ್ಣ ಕಣ್ನುಗಳ ಬಗ್ಗೆ

ನಿಮಿರುವ ಬಾಲದ ಬಗ್ಗೆ

ತುಪ್ಪಳದಂತ ಅದರ ಕೂದಲ ಬಗ್ಗೆ

ಸಪ್ಪಳವಾಗದಂತೆ ಬಂದು ಎದಮೇಲೆ ಮುಖವಿಟ್ಟು

ತಬ್ಬಿ ಮಲಗುವ ಅದರ ರೀತಿಯನ್ನು

ನೂರಾರು ಕತೆ ಕವಿತೆಯಾಗಿಸಿದ್ದಳು

ಸಾಕಷ್ಟು ಚಪ್ಪಾಳೆಗಳನ್ನೂ ಪಡೆದಿದ್ದಳು!

 

ಅರಿತೊ ಅರಿಯದೆಯೊ 

ಒಂದು ದಿನ  ನೆಲದಮೇಲೆ ಮಲಗಿದ್ದ ಅದರಬಾಲ

ತುಳಿದ ನೋವಿಗದು

ಅವಳ ಪಾದಗಳ

ಪರಚಿಬಿಟ್ಟಿತು.

ಆಮೇಲವಳದಕ್ಕೆ ಅನ್ನಹಾಲು ಹಾಕದೆ

ಕಿಟಕಿ ಬಾಗಿಲು ತೆರೆದು ಬಿಟ್ಟಳು

ಹಸಿವಾದರೆ ಅದರ ಆಹಾರವನ್ನದು ಹುಡುಕಿಕೊಳ್ಳಲೆಂದು

ಸುಮ್ಮನಿದ್ದು ಬಿಟ್ಟಳು.

 

ಹಾಲು ಅಭ್ಯಾಸ ಮಾಡಿಸಿದ ಅವಳದಕ್ಕೆ

ಬೇಟೆಯಾಡುವುದನ್ನೇ ಮರೆಸಿಬಿಟ್ಟಿದ್ದಳು

ಹಸಿವಿನಿಂದ ತತ್ತರಿಸಿದ ಬೆಕ್ಕು ದಿನದಿನಕ್ಕೆ ಕೃಶವಾಗಿ

ಕೊನೆಗೆ ಓಡಾಡಲು ಶಕ್ತಿ ಇರದಂತಾಗಿ

ಅವಳ ಪಾದಗಳ ನುಣುಪ ನೆಕ್ಕುತ್ತಲೇ ಸತ್ತು ಹೋಯಿತು.

ಈಗ ಮತ್ತವಳು ಸತ್ತು ಹೋದ ತನ್ನ ಬೆಕ್ಕಿನ ಬಗ್ಗೆ ಇನ್ನಷ್ಟು

ಆಕರ್ಷಕವಾಗಿ ಕವಿತೆ ಬರೆಯುತ್ತಿದ್ದಾಳೆ.

ಹಿಂದಿಗಿಂತ ಈಗ ಚಪ್ಪಾಳೆಗಳೂ ಹೆಚ್ಚಾಗಿವೆ!

 

 

 – ಕು.ಸ.ಮಧುಸೂದನನಾಯರ್ ರಂಗೇನಹಳ್ಳಿ 

Leave a Reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: