ಉಂಡುಲಕಾಳು ಕಂಡಿದ್ದೀರಾ?

‘ಉಂಡುಲಕಾಳು’ ಎಂದ ಹೆಸರು ಕೇಳಿದಾಗ, ಹೆಸರುಕಾಳು, ಅಲಸಂದೆ ಕಾಳು, ತೊಗರಿಕಾಳು… ಇತ್ಯಾದಿ ವರ್ಗದ ಯಾವುದೋ ಒಂದು ದ್ವಿದಳ ಧಾನ್ಯ ಇರಬೇಕು ಅಂತ ಭಾವಿಸುವ ಸಾಧ್ಯತೆ ಇದೆ. ಆದರೆ ಇದು ಧಾನ್ಯವಲ್ಲ ! ಹೀಗೆ, ಉಂಡುಲಕಾಳಿನ ವಿಶೇಷತೆ ಅದರ ಹೆಸರಿನಿಂದಲೇ ಆರಂಭವಾಗುತ್ತದೆ

ಮಲೆನಾಡು, ಕರಾವಳಿಗಳಲ್ಲಿ ನಾಮಾನ್ಯವಾಗಿ ಜನವರಿಯಿಂದ ಜುಲೈ ವರೆಗೆ ಹಲಸಿನಕಾಯಿ ಲಭ್ಯವಿರುತ್ತದೆ. ಕೆಲವು ತಳಿಗಳು ಬೇಗನೇ ಅಂದರೆ ನವೆಂಬರ್ ತಿಂಗಳಲ್ಲಿ ಕಾಯಿ ಬಿಡುವುದೂ ಇದೆ. ಇನ್ನು ಕೆಲವು ತಳಿಗಳು ಸೋನೆ ಸುರಿವ ಶ್ರಾವಣದಲ್ಲೂ ಸಿಗುತ್ತವೆ. ಒಟ್ಟಾರೆಯಾಗಿ ಹಲಸಿನಕಾಯಿಯ ವಿವಿಧ ಅಡುಗೆಗಳನ್ನು ಇಷ್ಟಪಡುವವರಿಗೆ ನವೆಂಬರ್ ನಿಂದ ಸಕಾಲ ಸುರುವಾಗುತ್ತದೆ.

ಎಳೆ ಹಲಸಿನಕಾಯಿಯ ವಿವಿಧ ಅಡುಗೆಗಳು ಹೆಚ್ಚಿನವರಿಗೆ ಚಿರಪರಿಚಿತ. ಬಲಿತ ಹಲಸಿನಕಾಯಿಯ ತರಾವರಿ ಪಲ್ಯ, ಹುಳಿ, ಹಪ್ಪಳ, ಚಿಪ್ಸ್, ದೋಸೆ ಒಂದು ಪ್ರಕಾರವಾದರೆ, ಬಲಿತ ಹಲಸಿನಕಾಯಿಯ ಸೊಳೆಗಳನ್ನು ಉಪ್ಪುನೀರಿನಲ್ಲಿ ಬೆರೆಸಿ, ಶೇಖರಣೆ ಮಾಡುವುದು ಇನ್ನೊಂದು ಪ್ರಕಾರ. ಹೀಗೆ ಉಪ್ಪುನೀರಿನಲ್ಲಿ ಶೇಖರಿಸಿದ ಹಲಸಿನಕಾಯಿಯ ಸೊಳೆಗಳಿಗೆ ವಿಶಿಷ್ಟ ರುಚಿ, ಪರಿಮಳ ಇರುತ್ತದೆ. ಇವುಗಳನ್ನು ಬಳಸಿ ರುಚಿಕರವಾದ ಪಲ್ಯ, ರೊಟ್ಟಿ, ಹುಳಿ ತಯಾರಿಸುತ್ತಾರಾದರೂ ‘ಉಂಡುಲಕಾಳು‘ ಎಂಬ ಎಣ್ಣೆಯಲ್ಲಿ ಕರಿದ ಸ್ನ್ಯಾಕ್ಸ್ ಗೆ ಪ್ರಥಮ ಸ್ಥಾನ. ಇದು ಬಹಳ ರುಚಿ ಮತ್ತು ತಯಾರಿಸಲು ಹೆಚ್ಚು ಸಮಯ ಬೇಡುವ ತಿನಿಸು. ಬೇಕರಿಗಳಲ್ಲಿ ಸಿಗುವುದಿಲ್ಲ, ಆಧುನಿಕ ತಾಯಂದಿರಿಗೆ ಇದನ್ನು ತಯಾರಿಸಲು ಗೊತ್ತಿರುವುದು ಕಡಿಮೆ. ಹಾಗಾಗಿ ಇದೊಂದು ಅಪ್ಪಟ ಗ್ರಾಮೀಣ ತಿನಿಸು ಹಾಗೂ ಆಧುನಿಕ ಅಡುಗೆಮನೆಯಲ್ಲಿ ಮರೆಯಾದ ‘ರೆಸಿಪಿ’ .

‘ಉಂಡುಲಕಾಳು’ ಗಳನ್ನು ತಯಾರಿಸಲು ಬೇಕಾಗುವ ಸಾಮಗ್ರಿಗಳು :

1. ಉಪ್ಪಿನಲ್ಲಿ ಹಾಕಿಟ್ಟ ಹಲಸಿನ ಸೊಳೆ ಮೂರು ಹಿಡಿ
2. ಕಾಯಿತುರಿ ಕಾಲು ಕಪ್
3. ಒಣ ಕೊಬ್ಬರಿ ಅರ್ಧ
4. ಚಿಟಿಕೆ ಅರಸಿನ
5. ಚಿಟಿಕೆ ಜೀರಿಗೆ
6. ಕರಿಯಲು ಎಣ್ಣೆ.

ವಿಧಾನ:

• ಉಪ್ಪು ಸೊಳೆಯನ್ನು ಹಿ೦ದಿನ ದಿನವೇ ಒ೦ದು ಪಾತ್ರೆಯಲ್ಲಿ ಹಾಕಿ ತು೦ಬ ನೀರು ಹಾಕಿ ನೆನೆಯಲು ಬಿಡಿ.
• ಮರುದಿನ ಅದರ ನೀರನ್ನೆಲ್ಲಾ ಚೆನ್ನಾಗಿ ಹಿ೦ಡಿ, ಸೊಳೆಗಳನ್ನು ಬೇರ್ಪಡಿಸಿ.
• ಹಿಂಡಿದ ಉಪ್ಪುಸೊಳೆಗಳನ್ನು ನೀರು ಹಾಕದೆ ಗಟ್ಟಿಯಾಗಿ ರುಬ್ಬಿ.
• ರುಬ್ಬುವಾಗ ಕಾಯಿತುರಿ,ಜೀರಿಗೆ,ಅರಸಿನ ಸೇರಿಸಿ.
• ಬೇಕಿದ್ದಲ್ಲಿ ಉಪ್ಪು ರುಚಿ ನೋಡಿ (ಸೊಳೆಗಳನ್ನು ಉಪ್ಪು ನೀರಿನಲ್ಲಿಯೇ ಶೇಖರಿಸಿ ಇಟ್ಟಿರುವುದರಿಂದ, ಅದರಲ್ಲಿ ಸಾಕಷ್ಟು ಉಪ್ಪು ಇರುತ್ತದೆ)
• ಒಣಕೊಬ್ಬರಿಯನ್ನು ಸಣ್ಣ ಚೂರುಗಳನ್ನಾಗಿ ಮಾಡಿ
• ಸಣ್ಣ ನೆಲ್ಲಿಕಾಯಿ ಗಾತ್ರದಷ್ಟು,  ರುಬ್ಬಿದ ಹಿಟ್ಟು ತೆಗೆದುಕೊ೦ಡು ಮಧ್ಯೆ ಒ೦ದು ಒಣಕೊಬ್ಬರಿ ಚೂರು ಇಟ್ಟು ಚಿಕ್ಕ ಚಿಕ್ಕ ಉ೦ಡೆಗಳನ್ನು ಮಾಡಿ.
• ಈ ಉಂಡೆಗಳನ್ನು ಕಾದ ಎಣ್ಣೆಯಲ್ಲಿ ಹೊಂಬಣ್ಣಕ್ಕೆ ಬರುವಂತೆ ಕರಿಯಿರಿ. ಉಂಡುಲಕಾಳು ಸವಿಯಲು ಸಿದ್ಧ.

 – ಸಾವಿತ್ರಿ ಭಟ್, ಪುತ್ತೂರು  

+119